Chelsea កំពុងចរចារទិញយក Hakim Ziyech ពី Ajax ក្នុងតម្លៃខ្លួន ៣៨ លានផោន

ក្រុមតោខៀវ Chelsea កំពុងតែធ្វើការចរចារជាមួយ Ajax ដើម្បីចុះហត្ថលេខាយកខ្សែបម្រើស្លាប Hakim Ziyech នារដូវក្តៅនេះក្នុងកិច្ចព្រមព្រៀងតម្លៃខ្លួន ៣៨ លានផោនដែលទំនងជានឹងត្រូវប្រកាសជាផ្លូវការនារយៈពេលប៉ុន្មានថ្ងៃខាងមុខនេះ។

កីឡាករវ័យ ២៦ ឆ្នាំរូបនេះគឺជាគោលដៅចំបងមួយរបស់អ្នកចាត់ការក្រុម Chelsea លោក Frank Lampard ក្នុងទីផ្សារដោះដូរកីឡាករនាខែមករា ប៉ុន្តែក្លឹបរបស់ហូឡង់ Ajax មិនមានបំណងលក់កីឡាកររបស់ខ្លួននាពេលនោះឡើយខណៈដែលពួកគេកំពុងតែផ្ដោតសំខាន់ដើម្បីដណ្តើមយកពានរង្វាន់ Eredevisie ។

Chelsea ត្រូវបានរាយការថាបានព្យាយាមនាំយកកីឡាករមួយចំនួនមកចូលរួមក្រុមកាលពីខែមករារួមមានខ្សែប្រយុទ្ធរបស់ Paris St-Germain កីឡាករ Edinson Cavani និងខ្សែប្រយុទ្ធ Daddy Mertens របស់ Napoli ដើម្បីយកមកជំនួសតំណែងរបស់ Eden Harzard ដែលបានទៅចូលរួមជាមួយ Real Madrid កាលពីរដូវកាលមុន ហើយពេលនេះ Hakim Ziyech គឺជាគោលដៅសំខាន់ដែលអាចជំនួសតំណែងមួយនេះបានដោយសាររូបគេបានបង្ហាយសមត្ថភាពកាលពីការប្រកួត Champion League ដែល Chelsea ស្មើរជាមួយ Ajax ៤-៤ ក្នុងទឹកដី Stamford Bridge កាលពីខែវិច្ឆិកា ២០១៩។ ហេតុផលមួយទៀតដែលធ្វើអោយ Chelsea ព្យាយាមនាំយកកីឡាករថ្មីៗមកជួយក្រុមគឺដោយសារកីឡាករបច្ចុប្បន្នដូចជា Willian និង Pedro នឹងត្រូវអស់កុងត្រានារដូវក្ដៅនេះ។

Chelsea មានកញ្ចប់ថវិការ ១៥០ លានផោនសម្រាប់នាំយកកីឡាករថ្មីមកចូលរួមក្រុម ហើយពួកគេក៏កំពុងតែចាប់អារម្មណ៍ទៅលើកីឡាករ Jodan Sancho របស់ Dortmund ប៉ុន្តែក្លឹបធំៗដូចជា Liverpool និង Manchester United ក៏ចង់បាន Sancho ដូចគ្នាផងដែរ។

ប្រភពពី៖ BBC News
ប្រែសម្រួលដោយ៖ 365 Cambo News