Xavi ថាវាលឿនពេកហើយដែល Barcelona ហៅខ្លួនអោយធ្វើជាអ្នកចាត់ការក្រុម

Xavi បាននិយាយថាគាត់បានបដិសេធឱកាសក្នុងការដឹកនាំក្លឹបចាស់របស់ខ្លួនគឺក្លឹបអ្នកមានបុណ្យ Barcelona កាលពីសប្តាហ៍មុនពីព្រោះឱកាសនេះបានមក “លឿនពេក” នៅក្នុងអាជីពជាគ្រូបង្វឹករបស់គាត់។

អតីតខ្សែបម្រើក្រុមជម្រើសជាតិអេស្បាញរូបនេះបានក្លាយជាអ្នកចាត់ការក្រុម Al Sadd ចាប់តាំងពីអាជីពបាល់ទាត់របស់គាត់បានបញ្ចប់ជាមួយក្លឹបនៃប្រទេសកាតាកាលនេះពីខែឧសភា។

Xavi បាននិយាយថានាយកប្រតិបត្តិរបស់ក្លឹប Barcelona លោក Oscar Grau និងនាយកផ្នែកកីឡាលោក Eric Abidal បានផ្តល់ឱ្យលោកនូវការងារជាគ្រូបង្វឹកបង្គោលមុនពេលលោក Ernesto Valverde ត្រូវបានបណ្ដេញចេញពីការងារកាលពីថ្ងៃច័ន្ទ។ “ខ្ញុំមិនយល់ស្របនឹងការផ្តល់ជូននេះទេជាពិសេសវាលឿនពេកសម្រាប់ខ្ញុំក្នុងការដឹកនាំក្រុម Barcelona ប៉ុន្តែវានឹងនៅតែជាសុបិន្តរបស់ខ្ញុំក្នុងការបង្វឹកក្រុមមួយនេះនាពេលអនាគត។” នេះបើតាមសម្ដីរបស់អតីតប្រធានក្រុម និងជាវីរៈបុរស់ក្រុម Barcelona ។

បន្ទាប់ពីបរាជ័យនាំយក Xavi មកធ្វើជាគ្រូវបង្វឹកថ្មី ក្រុមកំពូលតារាង La Liga បានតែងតាំងអតីតអ្នកចាត់ការក្រុម Real Betis គឺលោក Quique Setien ជំនួសវិញ ។

Xavi ដែលបានបង្ហាញខ្លួនច្រើនជាង ៧៥០ ដងសម្រាប់ក្រុម Barcelona នៅចន្លោះឆ្នាំ ១៩៩៨ និងឆ្នាំ ២០១៥ បានបន្ថែមថាគាត់ ចូលចិត្ត Setien "ខ្ញុំស្រឡាញ់វិធីដែលគាត់ធ្វើការហើយខ្ញុំរំពឹងថាគាត់នឹងទទួលបានជោគជ័យជាមួយនឹងក្រុម" ។

ប្រភពពី៖ BBC Sports
ប្រែសម្រួលដោយ៖ 365 Cambo News