Manchester United ព្រមលក់ Ashley Young អោយ Inter Milan ក្នុងតម្លៃខ្លួន ១,៣ លានផោន

ក្រុមបិសាចក្រហម Manchester United បានឈានដល់កិច្ចព្រមព្រៀងក្នុងការលក់ Ashley Young ទៅឲ្យក្លិប Inter Milan ក្នុងទីផ្សារដោះដូរកីឡាករនាខែមករានេះហើយ។ បើតាមសារព័ត៍មាន Sky Sports News បានបញ្ជាក់ថា Ashley Young នឹងធ្វើដំណើរទៅកាន់ទីក្រុង Milan នាថ្ងៃសុក្រនេះដើម្បីធ្វើការពិនិត្យសុខភាព ជាមួយនឹងកិច្ចព្រមព្រៀងតម្លៃខ្លួន ១,៣ លានផោន (១,៥ លានដុល្លារ) បូករួមទាំងប្រាក់រង្វាន់ផ្សេងៗទៀត។

ក្រុមរបស់លោក Antonio Conte ក៏ជិតឈានដល់កិច្ចព្រមព្រៀងដោះដូរជាមួយក្រុម Roma ផងដែរដែលនឹងនាំយកខ្សែការពារស្លាបឆ្វេង Leonardo Spinazzola មកកាន់ទឹកដី San Siro ខណៈដែល Matteo Politano នឹងត្រូវចាកចេញទៅរកទ្រនុំផ្សេងប៉ុន្តែនឹងមិនជះឥទ្ធិពលដល់កិច្ចព្រមព្រៀងរបស់ Ashley Young នោះទេ។

United ធ្លាប់បានផ្តល់កុងត្រាថ្មីដល់ Ashley Young កាលពីដើមខែនេះប៉ុន្តែអតីតកីឡាករជម្រើសជាតិអង់គ្លេសរូបនេះបានច្រានចោលការបន្តកុងត្រារយៈពេលមួយឆ្នាំនោះ ដោយរូបគេមានចំណាប់អារម្មណ៍ចង់ផ្លាស់ប្ដូរទៅកាន់ប្រទេសអ៊ីតាលីជាមួយក្រុម Inter Milan ។

Young បានបង្ហាញខ្លួនចំនួន ១៨ ប្រកួតនៅរដូវកាលនេះប៉ុន្តែទើបតែចាប់ផ្តើមការប្រកួតជម្រើសដូបូងចំនួន ១០ លើកតែប៉ុណ្ណោះក្រោមការដឹកនាំរបស់ Ole Gunnar Solskjaer ។ រូបគេបានចូលរួមជាមួយក្រុមបិសាចក្រហមពីក្រុម Aston Villa កាលពីខែមិថុនាឆ្នាំ ២០១១ និងបានបង្ហាញខ្លួន ឲ្យ ក្លិបចំនួន ២៦១ ប្រកួតដោយរកបាន ១៩ គ្រាប់។

ប្រភពពី៖ Sky Sports
ប្រែសម្រួលដោយ៖ 365 Cambo News