Man Utd កំពុងចចារជាមួយ Sporting Lisbon ដើម្បីទិញយកខ្សែបម្រើ Bruno Fernandes

ក្រុមបិសាចក្រហម Manchester United និង Sporting Lisbon បានជួបពិភាក្សាទល់មុខគ្នាជុំវិញការផ្ទេរកីឡាករ Bruno Fernandes ដែលមានតម្លៃខ្លួន ៦០ លានផោន។

Fernandes វ័យ ២៥ ឆ្នាំ បានស៊ុតចំនួន ២គ្រាប់ជួយអោយក្រុម Sporting យកឈ្នះ Vitoria Setubal ៣-១ ក្នុងការប្រកួតដណ្ដើមជើងឯកកំពូលនៃលីគកំពូលព័រទុយហ្គាល់កាលពីថ្ងៃសៅរ៍។ កីឡាករសញ្ជាតិព័រទុយហ្គាល់រូបនេះមានបំណង់ចង់ចូលរួមជាមួយក្លឹប Man Utd ប៉ុន្តែមិនទាន់មានកិច្ចព្រមព្រៀងរវាងក្លឹបទាំងពីរជុំវិញតម្លៃខ្លួនរបស់គេនៅឡើយទេ។ អ្នកចាត់ការទូទៅរបស់ក្រុម United លោក Ole Gunnar Solskjaer និងជំនួយការរបស់គាត់ Mike Phelan បានមកមើលការប្រកួតរបស់កីឡាករ Fernandes ក្នុងជំនួបរវាង Sporting និង FC Porto កាលពីថ្ងៃទី ៥ ខែមករា នេះ។

លោក Solskjaer បានបដិសេធមិននិយាយជាសាធារណៈអំពី Fernandes និងបានទទូចថាក្លិបនឹងចុះហត្ថលេខាលើគោលដៅរយៈពេលវែងតែប៉ុណ្ណោះនៅក្នុងទីផ្សារដោះដូរកីឡាករនៅខែមករា បើទោះបីជាខ្សែបម្រើ Paul Pogba និង Scott McTominay កំពុងតែញ៉ាំញ៉ីដោយរបួសក៏ដោយ។ ទោះយ៉ាងណាក៏ដោយគេមើលឃើញថាក្លឹប Manchester United កំពុងផ្តោតអាទិភាពខ្អស់ដើម្បីពង្រឹងប្រព័ន្ធបម្រើរបស់ខ្លួន។

បច្ចុប្បន្នក្រុមរបស់លោក Solskjaer កំពុងឈរនៅលេខ ៥ ក្នុងតារាង Premier League ដោយតាមពីក្រោយក្រុមលេខ ៤ Chelsea ចំនួន ៥ ពិន្ទុ និងកំពុងព្យាយាមប្រជែងកៅអីដើម្បីបានលេងនៅក្របខ័ណ្ឌ Champions League នៅរដូវកាលក្រោយ។

ប្រភពពី៖ BBC Sport
ប្រែសម្រួលដោយ៖ 365 Cambo News